Selamat Datang

STATUS DAN KEDUDUKAN DIKSITA

STATUS DAN KEDUDUKAN DIKSITA Seseorang  yang telah di Diksa diberi status dan kedudukan sebagai seorang Sulinggih di masyarakat....

Jumat, 06 April 2012

Gending Bebotoh

Tajen Siap

Satuuh idupne ngulurin indria. Memotoh adanina ngulurin momo. Momon kenehne ngulurin momo. Momon kenehne etohina. Sangkala ada anak nyambatang me-motoh sujatine ngetohin momon keneh. Selid sanja ngecelin siap, tengaine mandusang siap, sanjane medesin mombong siap. Semenganne ngempuang siap. Tuah i siap ane sida nyiepang kenehne. Lemah peteng kedengan angkihan kenehne pragat di kalangan tajenne.

Di nuju lakar ngoceke, tusing pesan ngrunguang payuk jakan. Panak nyebak nagih beliang baju ane anggona di awakne suba uek brengbeng.

Kurenane nagih pipis anggona meli lakar jakan. Sakewala pragatanga aji raos bangras. " Sajan nyai panak nyah. Nglantud-nglantudin pejalan icange luas ka tajen. Tusing mirib nyai nawang ?

Ne... ene apang nyai nawang, ane biying alab sangkur janggaran, manggo-angoan sandeh jambul godeg drupa dimpil karo uli desa Plaga ratun turas siape. Sangkala madan biying pamlagaan, sanggup mapalu tur ngalahang musuhne di tengah kalangan tajenne.

Beli suba ngadeang carike di labakane duuran kauh, mula tuah anggon ngetohin i biying plaga. Mirib eny nyai ngelah sisan buntilan ane kadut nyai di sabuke ? Deh.... deh mai aba !! Jalan telahang anggon ngetohin i biying plaga. Etohin aji sekancan kesugihan awake. Apang tawang nyai siape nenenan sanggup mekelin nyai manik sekecap, sugih nadak haha.... ha.... ha ... ha !!!??? "

"Cendekne enden malu meli lakar jakan. Nyanan menang, nah .... ditu mara meli lakar jakan. Utawi eda nyai buin nyakan, jeg baas lebeng, nasi ajak daaranne beli. Cundang siape anggon kuah, jambal ......"

"Cai panak bapa eda nyebak. Kenyingan iban caine !! Nyanan menang bapa meliang cai baju anyar. Nah .... ditu kenken keneh caine ?? Akuda keneh caine meli baju ? Ane mawarna kenken kenehang cai ? Eda ke lebihan tekenang lebak tali, Bapa sanggup meliang. Kenken keto, kebot kenawan liman caine nyekel pipis manjer sate, hi... hi.... hahahaha ".

Luhne laut mabat .... "Kenken Beli ?
Kaden ngelah carik tuah di labakane duuran kauh dogen, jani ento godeang Beli anggon ngulurin indria. Sekayan Beline uli dija totonan, dadi gadeang ? Mirib Beli ane meli carike ento ? engsap mirib Beli ? Nangke sautin icang ! Kaden carike totonan aban-aban icang nganten, pabaang reraman icange jumah kangin mapan Beli tawanga tusing ngelah ebuk. Prade ento kanti adep Beli, icang lakar mrakaraang. Icang lakar mulih, palas makurenan ajak Beli !!". Semeton Rare Angon Nak Bali Belog sane tresnain titiang. Muanine tusing masaut apa buin. Mageres nyemak krepe nyelepang siap laut maklies mesuang tusing nolih laad.
Kacrita siapne kalah !!????

Teked jumah bedak layah. Dapetanga umahne suung, somahne ajak pianakne tusing ada jumahne. Cara jlema punyah gelur-gelur ngaukin kurenanne. Matane barak, macelep kapaon napetang payuk puyung. Payukne pantinganga. Piring ??? Piring makeber. Gentong ?? Gentong kajeta. Makejang ane tepukina tusing baanga beneh. Aget luhne ajak panakne enu di pisaga ngidih nasi, yening keto meh-mehan lampuga tendasne.

Tusing teked ditu dogen inguh bayune. Kanti ka para Dewa gedegina. Makejang batarane ubat-abita, leluhurne orahang tusing sueca. Makejang temaha. Sanggahne uuga, tusing canang sari aturina, sakewala tain sampi aturina atamas.
Kenyel ngamuk, macelep ka duluan. Pules di beten longan, ngiah-ngiuh nyesel awak, bayune inguh ngetok-ngetok tendas mecik-mecik pelengan ... Cet....Cet...Cet....
Olih Ida Bagus Rai Putra. Buku Puspa Sari 2, Sabha Sastra Bali. Kaposting olih I Rare Angon Nak Bali Belog. Suksma

7 komentar:

  1. ... menarik.. walaupun tiang nenten bisa magending... http://sudiatmika.com

    BalasHapus
    Balasan
    1. Nak sing ja gendingan to bli, satua sbnarne, kwala judulne gending bebotoh, gending ngaran munyi, bebotoh = mamotoh = momo tohin,
      Munyin nak ngetohin momo,, pasti suba kangin kauh ngranayang hidup sengsara,,, hehehehe...

      #btw, jeg tua ja tuture nok,,, wkwkwk

      Hapus
  2. Suksma antuk kunjungannya... megending akidik2 kemanten... kanggeang hehehe... sukses selalu

    BalasHapus
  3. Balasan
    1. Tetap Thanks Kawan atas kunjungannya .... (artikelnya pake bahasa Bali kawan )

      Hapus
  4. Bli Eben nu ngelah buku lawas kene?? mantabbbbb...

    BalasHapus
    Balasan
    1. Ngelah lah ... masak ngelah dunk hahahaha.... buin mani payu ke Dharma Santi Nasional di Cilangkap Brur....

      Hapus

Buku Tamu