I Gajah Nyapa Kadi Aku | Mesatua Bali

Gajah Lampung

Ditu di alase bet ngeriung, ketuturan ada Gajah ane meawak gede, tegeh, kulitne tebel kakah, tur kereng ipun tanpa ingen. Sedak dina anu, I Gajah ento ngamuk. Sekancan taru ane ada ditu karubuh baan I Gajah. I Kedis, I Bojog, Kidang, tur ane lenan tusing ngelah tongos mesayuban. Taluh tur sebun I Kedis makejang ulung. I Kedis Siung kaliwat sebetne sawireh taluhne ane makere lekad ulung tur pianakne mati. Tan kodag baan jengah basangne nepukin solahne I Gajah. Keto masih buron ane lenan.

Sedek dina anu, buron-buron makejang mapunduh di carang-carang kayune bah. Para burone ento sangkep ngundukin solah ia I Gajah ane nyapa kadi aku. I Kedis Siung mepajar kene," Nah nyama-nyama ajak makejang ane idup dini dialase, yan buka kene sesai-sai solahne I Gajah, sinah suba iraga ajak makejang lakar mati. Sawireh umah tur amah-amahan I Rage suba telah keuwug tur kematiang teken I Gajah. Jani jalan ngeka daya, kenken baan apang nyidayang ngematiang I Gajah ". Semeton Rare Angon Nak Bali Belog sane wangiang titiang.

Yan mepalu arep, sinah suba iraga kaon, wireh ia buron kaliwat gede tur kereng" . Mesaut lantas I Kedis Blibis kene," Cang ngelah daya buka kene, kenken baan apang I Gajah buta tusing nepukin apa, di subane keto mara lantas dedehang ia apang ulung". Nah di subane keto, I Kedis Siung midep teken ia I Blibis tur mepaitungan ditu ajak ia I Goak, I Kedis Corek, teken I Kedis Gadangan. Di subane ingkup paitunganne ditu lantas pengeka dayane ento kelaksanayang.

Rikala rahina lemah galang, I Gajah klincak-klincak ditu di padange linggah laut I Kedis Corek mekeber tur maekin I Gajah. I Kedis Corek ngotolin sekancan kutu, tuma, tur ketekulan ane ada di awak I Gajah, apang tusing genit. I Corek sambilange magending di duur tundun ia I Gajah. Di subane keto, kasuen-suen, I Gajah merasa tis tur merasa kiap baane teken I Kedis Corek, lantas I Corek nyeritin la I Kedis Goak. I Goak teka kema, tur nyotot matane I Gajah buka dadua. I Gajah lantas bangun mekyayangan tur ngelur. Jlempah-jlempoh pati kaplug ia I Gajah wireh matane buta. 

Di subane keto lantas I Kedis Siung ngorahin ia I Buyung apang metinggah tur metaluh di matane, apang kanti matane mauled. Semeton Rare Angon Nak Bali Belog sane wangiang titiang. Nah, jangkep suba sakitne I Gajah. Ditu I Gajah sing medaya, tur pules dogen gaene naanang sakit. 

Ia tusing nyidayang ngamah tur nepukin yeh lakar inem. Di subane suba, I kedis Siung buin ngorahin nyamane ia I Kedis Gadangan apang memunyi di duwur pangkunge. Sinah suba ia I Gajah ngaden di tongos I Kedis Gadangan mamunyi ada yeh. Ningeh munyin I Kedis Gadangan, I Gajah kedropon melaib kema ngalih yeh baan keliwat bedakne. Nanging lacur, I Gajah tusing nawang teken ada pangkung dalem. I Gajah lantas ulung meglebug ke pangkunge dalem tur ngemasang mati.

Sasukat matine ia I Gajah, sebatek buron ane ada di alase ento sing ja buin ada ane ngadug-ngadug, stata nemuang rahayu, tur sukerta. Keto masih punyan kayu tumbuh mokoh-mokoh tur mebuah nged buin gede-gede. Mekejang pada liang.

Nah, kewiaktiang satuan I Gajah Nyapa Kadi Aku ento tuah medaging tutur apang sing raga nyapa kadi aku. Merasa awak paling ririh, paling aeng, paling gede tur tanpa tanding. Meparisolah nganguang idep. Solah ane nyapa kadi aku sinah lakar nemu baya, sengkala, tur ngemasang. Buka parisolah ia I Gajah..

Tetuwek Satua Bali I Gajah Nyapa Kadi Aku inggih punika :

- Tusing dadi sombong teken awake sugih, bagus, duweg, tur ngelah awak gede buin siteng.

- Laksana Nyapa Kadi Aku boya ja parisolah Dharma, laksana Nyapa Kadi Aku lakar liu nepukin musuh.

- Di gumine liu ajak idup. Sing ja patut iraga ngangguang keneh pedidi. Pasawitra uttawi penyama braya ento kone ane mautama.

Kambil saking Satua Bali I Punyan Kepuh Teken I Goak, oleh I.N.K. Supatra. Di edit dan diposting oleh Rare Angon Nak Bali Belog.