Rare Bali Anak Bali Belog Ngiring Ngajegang Bali dengan berbahasa Bali sane becik, senang ring Tembang Bali tur sekancan sastra lan Budaya Bali sane sampun kaloktah ring jagate mangda sumingkin jangkep tur paripurna #Bahasabali #AjegBudayaBali #RareBali

Breaking

Sabtu, 07 Desember 2013

I Kurmawa Ngambul

Pulau Serangan (google)
Kacrita ada penyu ajaka dadua luh muani. Suba makelo ia nongos di pasih Arnawane. Ane muani awakne selem tur mokoh madan I Kurmawa, ane luh kulitne masawang kuning madan Ni Kurmawi. Sadina-dina ajaka dadua ngulurin kita neda ganggeng muah bulung ane lumlum tur samah.

Keto masih soroh bene ane lenan, pasliwer ngalih tetedan. Rerad rerod ngajak pianak-pianakne muah kaluwargane. Makejang soroh bene lega namtamin kamelahan pasih Arwanane.

Dengarkan Audio Satua Bali I Kurmawa Ngambul. Klik disini

I Kurmawa muah Ni Kurmawi sedih jengah kenehne nepukin parisolah bene rerad-rerod ngajak pianak somah, pasliwer saling kepung. I Kurmawa lantas ngomong teken somahne kene. "Uduh ada Kurmawi, sedih keneh beline, yen nepukin nyama brayane rerad-rerod ngajak pianak somah, cara anak ngewerin yang rasayang beli. Mula lacur beline masomah ngajak adi. Suba makudang tiban mekelone beli ngajak adi ngulurin legan keneh, sakewala kayang jani tuara nyidayang numbuhang pianak, abungkul tuara ada ane lekad. Marasa kenyel adi suba mataluh, nanging kayang jani tuara ada ane lekad ".

"Uduh beli, saja pesan buka satuan beline. Eda sanget masel-selan ! Melahan jani jalan makaad uli dini ".
"Nah, yan keto pepineh adine, jalan jani kinkinang! Apa melahne dini, japi tusing kuangan tetedan yang tusing ngelah pianak anang aukud ". Keto pasaut I Kurmawane. Ajaka dadua lantas majalan ngambul, ngauhang ngalih pasihe ba dauh. Mara teked di loloane tepukina buaya luh muani sedek mememan. Buayane nyapatin, munyine alus, "Ih, penyu ajak dadua, lakar kija magregotan ngajang umah ? Sebenge cara anak sedih pesan. Apa kasebetang? Tegarang orahin awake! Dumadak sida baan awake nulungin !"



I Kurmawa masaut banban, " Kene suba lacur
tiange buka tusing pesan Widhine olas teken tiang. Saja pesan buka munyin jerone, buka ngambule keneh tiange, wireh suba makelo tiang makurenan kayang jani tuara numbuhang pianak. Nyen lakar ngentinin nutugang katurunanne kawekas? Marasa kenyel somah tiange mataluh di parangan tengah pasihe, aukud tuara ada ane lekad. Soroh bene lenan makejang suba ngadakan pianak saling paliunin. Ento ane ngawinang tiang ngambul ".

I Buaya kapiolasan kenehne, ningeh munyin penyune buka keto, lantas masaut. "Uduh Kurmawa, eda bes sanget ngulurin sedih. Jani awake ngorahin tutur. I pidan wake masih maan buka keto, makelo tusing ngelah katurunan. Kema mai mataluh di loloane, aukud tuara ane lekad. Ditu lantas wake nunas ica ring Betara. Saking teleb awake nunas ica, lantas rauh Betara Suria ngicenin panugrahan. Wake apanga suud mataluh di tengah yehe, wake kapangandikayang apanga mataluh di pasisi. Uli ditu wake ngiringang pangandikan Betara Suriane. Ane jani wake suba liu numbuhang pianak. Jani Kurmawa Kurmawi ajak dadua apang pageh ngastiti Ida Betara Suria !"

I Kurmawa muah Ni Kurmawi lantas ngungsi parangane ngenjor di tengah pasihe. Ditu lantas ia nunas ia nunas ica ngastiti Betara. Ajaka dadua kukuh, pageh kenehne ngastawa Betara Suria. Yang makudang dina suba makelone ngastiti, rauh Ida Betara Suria di arepan goane.

"Uduh cening Kurmawa Kurmawi, bengong nira ngeton kepagehang ceninge ngastiti nira. Nira suba nawang buat tetuon ceninge. Uli makelo cening suba marasa sedih, sawireh tuara sida numbuhang pianak. Dini titu mataluh, di parangan tengah pasihe, sakewala abungkul tuara ada ane lekad. Ane jani Nira ngorahin cening, sing sida baan Nira lakar nulungin, yan cening enu mataluh di parangan tengah pasihe. Ah, ento ada bias di sisin pasihe, melah pesan tongos ceninge mataluh. Yan suba masane mataluh, bisang awak ceninge nyujur biase di pesisi. Ditu cening ngalih tongos ane melah ! Gaenang awake bangbang tongos mataluh. Yang suba suud matalah, ingetang bangbange urugin, apang tusing ada anak nawang. Sesubane suud ngurugin bangbange lautang cening buin ngungsi tengah pasihe. Nira lakar setata nyunarin tur ngamertanin taluh ceninge.  Da ja sangsaya ! " Keto pangandikan Ida Betara Suria.

I Kurmawa muah Ni Kurmawi, kenehne lega lantas matur. "Inggih Ratu Betara, ngawit saking mangkin rauh kawekas titiang pacang mataluh ring biase sane wenten ring sisin segarane. Titiang dahat nyuksmemayang pasuecan Betara. Mogi-mogi titiang sida numbuhang sentana, sekadi soroh ulame sane tiosang ". Suud ia matur, Betara Suria gelis musna.

Yan kudang dina suba makelone ia maan panugrahan Betara, Ni Kurmawi marasa dewekne lakar metaluh, lantas ngomong teken somahne, " Beli Kurmawa ene suba masanne tiang lakar mataluh. Jani jalan ka pasisi buka pangandikan Betara Suria. Dumadak prasida buka pangaptine, taluhe pada engsah ".

Ditu laut I Kurmawa ngateh somahne ka pesisi. Teked di pasisi Ni Kurmawi nylisib ngalih tongos ane melah. Suba pragat ngae bangbang ngenggalang ia mataluh tur kaurugin. Laut ajaka dadua mawali ka tengah pasihe.
Nah, yan kudang dina suba makelone ia mataluh, saking pasuecan Ida Betara Suria nyunarin taluhne, dadi lekad pianakne. Makejang ngrepe ngalih reramanne. Lega pesan keneh I Kurmawa muah Ni Kurmawi nepukin pianakne pasliab saling kepung.

Ceritayang suba pada kelih, truna, pianakne tur suba nyandang mapakurenan. I Kurmawa muah Ni Kurmawi nuturin pianak-pianakne makejang, buat pasuecang Ida Betara Suria. Makejang tuara bani tulak ngiringang pangandikan Betara. Ento makrana kayang jani penyune mataluh di pasisi. Ia sukeh ngadakang katurunan.

Patut pesan penyune sayangan, apang tusing kanti punah dijagate. Tusing dadi nampah penyu sakita-kita. Saking buku Jaran Pondongan Kamijilang olih Sabha Sastra Bali, Denpasar. Suksma. (RANBB)

Opini. Kenyataannya kini Pulau Serangan di Bali Selatan yang merupakan pulau Penyu, sudah direklamasi dan Penyu-penyu itupun sudah pergi entah kemana. Hidup manusia hanya untuk kepuasan didunia dan sangat mengabaikan kehidupan mahluk lain. Jangan salahkan orang lain, bila kita sendiri (Nak Bali Hindu) mengijinkan kegiatan-eksplorasi alam Bali secara berlebihan.

Tidak ada komentar:

Posting Komentar

Buku Tamu

Cari Blog Ini

Pengikut

Blog Archive